Emausko trapuketarien egoitza berria. Elkarteak Iruñeko Azpilagaña auzoan zuen azoka itxi, eta beste bat zabaldu du, Arrosadian, bildutako objektuak saltzeko

EDURNE ELIZONDO- IRUÑEA

Astebete pasatxo daramate Emausko Trapuketariek Arrosadian. Irailaren 31n zabaldu zuten azoka berria, Iruñeko auzo horretako Julian Gaiarre karrikan, laugarren eta seigarren zenbakien artean.

Etxabe handia da, eta han, trapuketariek dituzten gainontzeko azoketan bezala, denetarik aurki dezake erosleak: haurrentzako ipuinak, aldizkariak, altzariak, jostailuak, arropa, etxeko tresnak eta abar eta abar.

Atzo, Jesus zegoen Arrosadiko azoka berria zaintzen. Jende ugari bazen dendan, arropei so, altzariak ikusten eta ipuinen artean gustukoena bilatzen. Bezeroek zer erosi erabakitzen zuten bitartean, Arrosadiko azoka zabaltzeko arrazoiak azaldu zizkigun Emausko Trapuketariak elkarteko kideak: «Azpilagañan genuen etxabea garestiegia zen; han ezin genuen jarraitu».

Hainbat etxabe ikusi zituzten Gaiarre karrikakoa hau-tatu baino lehen. «Molda-ketarik egin behar ez genuelako aukeratu genuen hau; gure gauzak ekarri beste-rik ez dugu egin behar izan, eta kanpoko aldea margo-tu, hemen gu gaudela iragartzeko. Autoa uzteko zailta-sunak dira alde txar baka-rra».

Zabaldu zenetik, hala ere, «jende ugari» pasatu da Emausko Trapuketarien azoka berritik. «Era askotako jendea etortzen da. Ikasturte berriaren hasieran, ikasle asko etortzen da gurera, alokatutako etxebizitzarako altzarien bila».

Arrosadian bildutako objektu guztiak «jendeak emandakoak» dira. Arrosadiko azokaz gain, Arrotxapean beste bat du elkarteak, eta laster, beste bat zabalduko du, hirugarrena. Lizarran ere bada trapuketarien azoka bat. «1972. urtetik gaude Nafarroan, eta egun, ehundik gora lagun daude elkartean. Egoera zaila dutenei lana ematea da gure helburua».

Azoka bat Arrosadian. Berria.Info 2003/10/09